ଅକୁହା କଥା

ତମ ସାଥେ କଥା ହେବାର ଅଛି ଅନେକ,
କିନ୍ତୁ ହାୟ !
ଜାଣିନି ସମୟ ନା
ତମେ ସାଜୁଛ ପ୍ରତିବନ୍ଧକ ।

କହିବାର ଅଛି-
ଅନେକ କଥା,
ଦିନ ପରେ ରାତି
ରାତି ପରେ ଦିନ
ବିତି ଚାଲିଯିବ
ତଥାପି, ସରିବ ନାହିଁ ସେ ଗାଥା ।

ନ କହିଲେ,
କାନ୍ଦିବ ଶେଫାଳି
କାନ୍ଦିବ ଝରଣା
ଆଉ ଆକାଶଟା ଫାଟିଯିବ
ସଭିଏଁ କରିବେ ଶୋକ,
ତଥାପି...
କାହିଁ, କିଏ ବା
ସେହି, ଯେକି ସାଜୁଛି
ଆମ ରାସ୍ତାର କଣ୍ଟକ ।

ଖୋଜିବାକୁ କହିଥିଲି ତା'ର ଠିକଣା,
ପବନକୁ...  ବର୍ଷାକୁ...
ଚାରିଆଡେ ଘୁରୁଥିବା ଭଅଁରକୁ,
ସମସ୍ତଙ୍କ ଇଙ୍ଗିତ ମୋ ଆଡେ,
ମୁଁ କାଳେ ମିଶିବାକୁ ଚାହେଁନା,
ଚାହେଁନି ମୁକ୍ତ ହୋଇ ଉଡିବାକୁ
ଭାଙ୍ଗି ବନ୍ଧନ ଶିକୁଳିର ବାଡେ ବାଡେ ।

ନିଷ୍ଠୁର ସମାଜେ
ନିଷ୍ଠୁର ହୋଇ ମୁଁ
କେତେ ଦିନ ବା ବଞ୍ଚିବି...।
କୋମଳ ହୃଦୟେ
ସରଳ ବହି,
ପାଖକୁ ଘେନିଯା'
ସବୁ କଥା ତତେ କହିବି ।