ମାଆ ନାରାୟଣୀ

ସିନ୍ଦୂରେ ମଣ୍ଡିତ, ନଥ, ଗୁଣା, ଦଣ୍ଡି

ମସ୍ତକେ କିରୀଟ ଦିଶଇ ଶୋଭା

'ମାଆ ନାରାୟଣୀ', ଦୟାମୟୀ ତୁ

ଦୁଃଖ ହାରିବାକୁ ହୋଇଛୁ ଉଭା । || ୧ ||

ଦୁର୍ଗତି ତାରିଣୀ, ଆର୍ତ୍ତ ନିବାରିଣୀ

ହର ପ୍ରିୟା କଇଳାସ ମଣ୍ଡନୀ

ଦଶ ମହାବିଦ୍ୟା ସ୍ଵରୁପିଣୀ ସିଦ୍ଧିରୂପା-

କାତ୍ୟାୟନୀ ତୁ ନାରାୟଣୀ । || ୨ ||

ଝଙ୍କଡେ ବୋଲାଉ ତୁହି "ଶାରଳା"ଲୋ

କାକଟପୁରରେ ତୁଉ 'ମଙ୍ଗଳା'

କୋଣାରକରେ ତୁ ରାମଚଣ୍ଡୀ ପୁରୁ-

ଷୋତ୍ତମ କଟକେ ତୁଇ 'ବିମଳା' । || ୩ ||

ବାଙ୍କିରେ ଚର୍ଚ୍ଚିକା ବୋଲାଇ ମାଅଲୋ

ସମ୍ବଲପୁରରେ ତୁ 'ସମଲାଇ'

ବାଣପୁରରେ ତୋ ନାଆଁ 'ଭଗବତୀ'

ଭୁବନେଶ୍ଵରରେ ଗଉରୀ ବୋଲାଇ । || ୪ ||

ବଡମ୍ବା ରାଜ୍ୟରେ 'ଭଟ୍ଟାରିକା' ନାମ

ଭୁଷଣ୍ଡ ପୁରରେ ତୁ 'ଉଗ୍ରତାରା'

ଆସିକାରେ 'ଖମ୍ବେଶ୍ଵରୀ' ମନ୍ତ୍ରୀଡିରେ

'ଭୈରବୀ' ନାମେ ତୁ ବିଖ୍ୟାତ ପରା ! || ୫ ||

କୁଲାଡରେ 'ବ୍ୟାଘ୍ରଦେବୀ' ଡୁମ୍ବୁଳାରେ

'ବାଙ୍କେଶ୍ଵରୀ' ବୋଲି ଭକତ ଡାକେ

"କନ୍ଧୁଣୀ ଦେଇ"ତୁ ସୋରଡାରେ 'ତାରା-

ତାରିଣୀ' ପୁରସ୍ତମପୁର ପାଖେ । || ୬ ||

ଖଲିକୋଟରେ ତୁ 'ନାରାୟଣୀ' 'ଶ୍ୟାମ-

ଳାୟୀ' ନାଆଁ ବୁରୁପଡାରେ ତୋର

'ମହୁରୀ କାଳୁଆ' ରୂପେ ବ୍ରହ୍ମପୁରରେ

ଯାଚି ଯାଚି ତୁ ଦେଉଛୁ ବର । || ୭ ||

ଆଦିଶକ୍ତି, ଆଦିମାତା, ଆଦ୍ୟାରୂପା

ଅଯୋନି ସମ୍ଭୂତା ଗଣେଶ ମାତ

ବୈଷ୍ଣବୀ, ରୁଦ୍ରାଣୀ, ବ୍ରହ୍ମାଣୀ ତୁ ଯୋଗ-

ମାୟା ରୂପେ ଏହି ସଂସାରେ ଖ୍ୟାତ । || ୮ ||

ସର୍ବ ମଙ୍ଗଳ ଦାୟିନୀ, ହରପ୍ରିୟେ

ଅସହାୟେ ଡାକଇ ମୁଁ ଆରତେ

ଦୁଃଖ ଉଦ୍ଧାରିଣୀ ପଶିଲି ଶରଣ

ଫେଡ ମୋ କଷଣ ସୁଦୟା ଚିତ୍ତେ । ||୯||

ଶରଣ ରକ୍ଷଣୀ ମାଆ ନାରାୟଣୀ

ଅଭୟ ପାଦେ ତୋ ଗଲି ଶରଣ

ଏତିକି ମାତର ଜାଣିଛି ଏ ହରି-

କୃଷ୍ଣ ତୋର ପାଦ ଅଭୟ ସ୍ଥାନ । || ୧୦ ||